Watanymyzyň geljegi hasaplanylýan ýaş nesillere berilýän bilimiň ugurlaryny giňeltmek, mazmunyny çuňlaşdyrmak babatda ýurdumyzda ägirt uly işler durmuşa geçirilýär. Täze gurulýan orta mekdepleriň maddy-tehniki binýadynyň pugtalandyrylmagy, olarda häzirki zaman ylmynyň gazananlarynyň ornaşdyrylmagy, okuwçylaryň döwrebap kompýuterlerden peýdalanmagyna şertleriň döredilmegi, okatmagyň häzirki zaman usullarynyň girizilmegi munuň aýdyň mysaly bolup durýar.
Türkmen halkynyň milli bilim-terbiýe ulgamy çuňňur pähim-paýhasy kemala getirmegiň esasynda jemgyýeti jebisleşdirmegiň, şonuň netijesinde jemgyýetiň ähli döredijilik kuwwatynyň ösüşe, tutuş jemgyýetiň abadançylygyna gönükdirilmegini üpjün etmegiň netijeli serişdesidir. Halkyň bilim-terbiýe däplerinde, jemgyýetçilik pähiminde ýokary ahlaklylyk, ynsanperwerlik, adalatlylyk, arassalyk, halallyk, sagdyn durmuş ýörelgelerine eýermek, birek-birege hormat goýmak, deňhukuklylyk ýörelgeleri öz beýanyny tapýar. Ylymly-bilimli, giň gözýetimli, ahlak taýdan arassa we ynsanperwer ýaşlary taýýarlamaga we terbiýelemäge ukyply häzirki zaman bilim ulgamy halkyň eşretli durmuşda ýaşamagynyň esasy çeşmesi hasaplanylýar.
