Hormatly Prezidentimiziň pähim-paýhasly baştutanlygynda berkarar ýurdumyzda bilim ulgamyny has-da kämilleşdirmek, ýaş nesilleriň daşary ýurt dillerini çuňňur öwrenmäge höweslerini artdyrmak, olaryň zehinlilerini ýüze çykarmak maksady bilen welaýat Baş bilim müdirliginiň Türkmenistanyň Magtymguly adyndaky Ýaşlar guramasynyň welaýat geňeşi bilen bilelikde geçiren «Dil bilen — dana» atly bäsleşiginiň welaýat tapgyryna gatnaşan okuwçylar emin agzalarynyň taýýarlan soraglaryna jogap berdiler, iňlis dilinde düzme ýazdylar, ýörite temadan taýýarlan wideoroliklerini iňlis dilinde beýan etdiler.
Örän çekeleşikli geçen bäsleşikde Türkmenbaşy şäherindäki 5-nji orta mekdebiň 11-nji synp okuwçysy Aýgül Hallyýewa deň-duşlaryndan saýlanyp, birinji orny eýelemegi başardy. Şol mekdebiň 11-nji synp okuwçysy Aýşa Ilmämmedowa ikinji, Balkanabat şäherindäki 15-nji orta mekdebiň 10-njy synp okuwçysy Ahmet Gazakbaýew üçünji orunlara düşdüler.
