Berkarar döwletiň täze eýýamynyň Galkynyşy döwründe milli mirasymyzy gorap saklamaga, ony dünýä ýaýmaga ýaşlarymyzy millilik ruhunda terbiýelemäge Gahryman Arkadagymyzyň, Arkadagly Gahryman Serdarymyzyň taýsyz tagallalary bilen uly ähmiýet berilýär. Golaýda Türkmenistanyň Magtymguly adyndaky Ýaşlar guramasynyň Aşgabat şäher hem-de Aşgabat şäheriniň Bagtyýarlyk etrap geňeşiniň bilelikde guramagynda umumybilim berýän orta mekdepleriň okuwçylarynyň hem-de ýokary we orta hünär okuw mekdepleriniň talyplarynyň gatnaşmagynda «Nusaý» taryhy ýadygärlikler toplumyna gezelenç guraldy.
Gezelenjiň dowamynda akyldar şahyrymyz Magtymguly Pyragynyň eserleri, «Nusaý» taryhy ýadygärlikler toplumynyň taryhy ähmiýeti, hormatly Prezidentimiziň jöwher paýhasyndan dörän «Änew — müňýyllyklardan gözbaş alýan medeniýet» atly kitabyndaky taryhy maglumatlar dogrusynda ýaşlaryň arasynda täsirli gürrüň edildi. Nusaý galasynyň taryhy gymmatlygy, ol ýerden tapylan birnäçe tapyndylar dogrusynda goraghananyň hünärmenleri giňişleýin gürrüň berdiler.
