Arkadag Serdarly bagtyýar ýaşlar ýylynyň 7-nji sentýabrynda «Zenan kalby» žurnalynyň redaksiýasy Balkan welaýat häkimligi, Türkmenistanyň Kärdeşler arkalaşyklarynyň Balkan welaýat birleşmesi bilen bilelikde gündogaryň beýik danasy Magtymguly Pyragynyň doglan gününiň 300 ýyllygyna bagyşlanan döredijilik duşuşygyny geçirdi.
Magtymguly etrabynyň Magtymguly Pyragy müzeýinde geçirilen döredijilik duşuşygy «Jeýhun bilen bahry-Hazar arasy» diýlip atlandyryldy. Onda Türkmenistanyň Kärdeşler arkalaşyklarynyň Balkan welaýat birleşmesiniň başlygynyň orunbasary Bibijan Nurmämmedowa, «Balkan» welaýat gazetiniň uly habarçysy Nursoltan Depbiýewa, welaýat taryhy we ülkäni öwreniş müzeýiniň direktory Azatgül Hojaberdiýewa, Magtymguly etrabynyň Gerkez geňeşliginiň oba medeniýet öýüniň tans goýujysy Göwherşat Aşyrowa dagy çykyş etdiler. Çykyşlarda Magtymguly Pyragynyň ömri we döredijiligi baradaky gyzykly gürrüňler beýan tapdy, şeýle-de şahyryň Watan, gahrymançylyk, il-ýurt, gözel tebigat baradaky şygyrlaryna, Gahryman Arkadagymyzyň ylham joşgunyndan dörän «Pähim-paýhas ummany Magtymguly Pyragy» atly goşgusyna giň orun berildi.
