Kitaplar dünýäsi! Ynsan aňynyň kämilleşmegi üçin giňden açylan gapy. Taryhyň gatlaryna ser salanymyzda, biziň döwrümize ýetip gelen kyssalardyr eposlaryň, şahyrlaryň şygyrlarydyr rubagylarynyň halkymyzyň ruhy dünýäsiniň şuglasy bolup ýalkym saçýandygyna şaýat bolýarys. Hakykatdan hem kitaphon, şahandaz halkymyzyň kitaba mukaddeslik hökmünde garandygyna, şahyrlaryň şygyrlaryny aýdyma salan bagşylara uly hormat goýandygyna gojaman taryhyň saralan sahypalary şaýatlyk edýär. Nurmyrat Saryhanowyň «Kitap» hekaýasyndaky guba düýesini kitaba çalşan Welmyrat aganyň keşbi bolsa, ylym-bilime muşdak türkmen halkynyň arassa kalbyny açyp görkezýär.
Halkymyzda toýa sowgat-serpaýly barmak ýagşy ýörelge bolupdyr. Döwlet baýramçylyklary mynasybetli Gahryman Arkadagymyzyň pähim-paýhasa ýugrulan gymmatly eserleri halkymyza sowgat etmegi ajaýyp däbe öwrüldi. Gymmatly maglumatlary özünde jemleýän, ýaş nesle watanperwer, ilhalar nesiller bolup ýetişmegi ündeýän ajaýyp kitaplar bolsa halkymyz üçin mukaddes gollanma bolup hyzmat edýär.
