Asyrlaryň dowamynda ata-babalarymyzyň döreden sungat eserleri häzirki nesillere taryhy öwrenmäge uly goldaw berýär. Senetçiligiň iň inçe görnüşleriniň biri hem zergärçilik sungatydyr. Bu sungat önümleri asyrlaryň dowamynda öz çeperçiligini ýitirmän, biziň günlerimize çenli gelip ýetdi. Gözbaşyny gadymy döwürlerden alyp gaýdýan zergärçilik sungatymyz Berkarar döwletiň täze eýýamynyň Galkynyşy döwründe täzeçe röwüşde kämilleşýär. Bezeg şaý-seplerini ulanyş maksatlaryna görä dürli görnüşlere bölmek bolýar. Olaryň arasynda çagalaryň şaý-sepleri aýratyn orun eýeleýär.