Halkymyz söze çäksiz hormat goýýar. Halkyň söze goýýan hormaty taryhda kämil paýhaslaryň ençemesiniň döremegine esas bolup hyzmat etdi. Şol kämil paýhaslaryň biri-de halkymyzyň hakydasynda hemişelik orun alan akyldar şahyr Magtymguly Pyragydyr.
Şahyryň ýaşan hem-de şol goşgulary döreden döwründen bäri üç asyra golaý wagt geçse-de, olaryň gymmatyny ýitirmän, eýsem, barha hümmetini artdyrmagynyň özeninde bir hakykat bar. Ol hakykat şahyryň şygyrlaryna halkyň taryhy ýolundaky durmuş tejribesine laýyk gelýän häsiýetleri öwüt-ündew edýänligindedir. Onuň şygyrlary nesilleriň ýörelge edinmeli häsiýetlerine eýlenendigi bilen ýüreklere em, argyn bedenlere kuwwat, sussupese ruhy ganat bolýar.