Ene-mamalarymyzdan miras galan milli sungatymyz asyrlar aşyp, biziň günlerimize ýetipdir. Milli sungatymyz has-da baýlaşdyrylyp gyz-gelinleriň ýürek beýanyna öwrülipdir. Bu täsin gözelligiň döreýşi halyda çitime, keşdede gaýma geçirilip, aýratyn öwüşgin bilen beýan edilipdir. Bu nepis sungatyň döremegi türkmen halkynyň ýaşaýyş-durmuşyny gözellige gaplapdyr. Halkymyz haly önümleri bilen öýleri bezäpdirler. Gelin-gyzlaryň hünäri bolan keşdedir gaýmalar diňe egin-eşikleri bezemän, eýsem, saçakdyr elýaglyk hökmünde hem ulanylypdyr. Türkmen milliligini, gözel tebigatyny, janly-jandarlary, ähli göze görünýän gymmatlygy nepis sungatda beýan edip bilmek ussatlyk hasaplanypdyr. Häzirki döwrümizde hem haly önümleri has gözel görnüşe gelip, olara gymmatly baýlyk hökmünde garalýar.
Ady äleme dolan türkmen halysy maşgalada eneden agtyga, agtykdan çowluga, çowlukdan ýuwluga geçýän gymmatly mirasdyr. Türkmen maşgalasynda kemala gelen gyzjagazyň gulpakly döwründen «eneme meňzäsim gelýär» diýen buýsançly sözleri, el işlerini öwrenmekde erjelligini, yhlasyny görkezýär. Maşgalada şeýle inçe senet bilen zähmete ugrukdyrylan gyz çagada maksada okgunlylyk, asyllylyk, agraslyk ýaly sypatlaryň jemlenmegine ýardam edýär. Milli terbiýäniň gözbaşy maşgaladan başlanýar. Bu gymmaty ýitmeýän inçe sungaty türkmen zenanynyň terbiýesinde görmek milli ruhdaky terbiýe bilen berk baglanyşyklydyr.
