2023-nji ýylyň 21-nji aprelinde türkmen topragynda her bir ynsanda ahlak arassalygyny, sabyr-kanagatlylygy, şükranalygy, ruhy tämizligi terbiýeleýän mukaddes Oraza baýramy döwletli ojaklary mähri bilen ýyladar. Oraza aýy Gündogar halklarynyň köpüsiniň taryhy-medeni kökleriniň umumydygyny kesgitleýän, ynsanlary biri-birine ýakynlaşdyrýan, ahlak päkliginiň dessurlary berjaý edilýän ajaýyp günleri öz içine almak bilen, onuň ynsanperwerlikde, agzybirlikde garşylanmagy türkmen halkynyň parahatçylyk söýüji ösüş ýolundan batly gadamlar bilen barýandygynyň subutnamasydyr.
Oraza baýramynyň saba-säherleri ýagşy dilegler bilen başlanar. Milli däp-dessurlarymyza görä, her bir adam baýramçylyga niýetläp tikinen täze lybaslaryny geýer. Desterhanlar milli tagamlar bilen bezeler. Oraza aýynyň mukaddesligi bilen nurlanan kalplar biri-birini gutlamaga howlugar. Ene-mamalarymyz bu gün: «Öten-geçenleriň ruhlary hem duýarmyş» diýip, dürli tagamlar bişirip, ys çykararlar. Soňra bu tagamlary goňşy-golamlara paýlarlar. Metjitlerde baýram namazy okalyp, mukaddes ýerlere zyýarat edilip, türkmen halkynyň Milli Lideri, Gahryman Arkadagy, Arkadagly Serdary bilen birlikde Berkarar döwletiň täze eýýamynyň Galkynyşy döwründe bagtyýar durmuşda, asuda asmanyň astynda ýaşamagy üçin ýagşy arzuw-niýetlere beslenen doga-dilegler ediler.
