Suwasty syýahat guralar
Amerikan işewürleri Larri Konnor bilen Patrik Laheý «Titanik» gämisiniň batan ýerine suwasty syýahaty guramakçydyklaryny mälim etdiler. Batanyna 110 ýyldan gowrak wagt bolan gäminiň galyndylary Atlantik ummanynyň demirgazygynda suwuň 3 müň 800 metr aşagynda ýatyr. Işewürler bu çuňluga barmak üçin «Triton 4000/2 Abyssal Explorer» atly suwasty gämiden peýdalanmagy maksat edinýärler. Laheý «Triton Submarines» atly kompaniýanyň esaslandyryjylarynyň biri bolup, bu ugurda tejribeli hünärmenleriň biridir. Konnor bolsa, gozgalmaýan emläk kompaniýasyna ýolbaşçylyk edýär. Konnoryň kompaniýasy suwasty syýahatyň deňizçilik guramasy tarapyndan doly tassyklanandan soňra amala aşyryljakdygyny mälim etdi. Bu kyn syýahatda ulanyljak gämi 4 müň metre çenli çuňluga gitmäge ukyply bolar. Suwuň aşagyna gidildigiçe basyş ýokarlanýar. Şol sebäpli suwuň aşagyna näçe çuňluga gidiljek bolsa, gämi hem şonçarak berk bolmaly.