Ýaponiýada agaçdan ýasalan emeli hemra kosmosa iberiler. «LignoSat» atly enjamyň agramy bary-ýogy 1 kilogram töweregi. «Sumitomo Forestry» (SFC) kompaniýasy bilen Kýoto uniwersitetiniň bilelikde işläp taýýarlan enjamynyň taýýar bolandygy mälim edildi. Bilelikdäki beýanatda arzan bahaly, daşky gurşawa zyýansyz kosmos tehnologiýalaryny işläp taýýarlamak maksady bilen ýola goýlan taslamanyň çäklerinde enjamyň 4 ýylda öndürilendigi aýdyldy. Kosmosa goýberiljek enjamda çüý, ýelim ýaly zatlar ulanylman, bölekleri diňe adaty usullar arkaly birleşdirilipdir. Kiçi göwrümli emeli hemra Halkara Kosmos Bekedinde geçirilen synaglarda berkligi we çat açmaga garşy durujylygynyň ýokarydygy anyklanan magnoliýa agajyndan ýasalypdyr. Emeli hemranyň sentýabr aýynda ABŞ-nyň Kennedi adyndaky kosmodromyndan orbita goýberiljekdigi mälim edildi.
Jennet Atdaýewa,