Şu gün ýurdumyzda Bilimler we talyp ýaşlar güni mynasybetli ähli okuw jaýlarynda aýdym-sazly baýramçylyk çäreleriniň şatlyk şowhuny belentden ýaňlandy. Her ýylda bolşy ýaly, ýurdumyzyň orta, orta hünär we ýokary okuw mekdeplerinde müňlerçe ýaşlar täze okuw ýylyna başlaýarlar. Üstümizdäki 2022-2023-nji täze okuw ýylynyň ilkinji gününde hem säher bilen mekdep okuwçylary hem-de talyp ýaşlar öz okuw jaýlaryny doldurdylar. «Halkyň Arkadagly zamanasy» ýylynda Aşgabat şäherinde orta mekdebe 1-nji synpa gidýän körpejelerimiziň sany 19 müňe golaý bolup, olara hormatly Prezidentimiziň adyndan ýörite öwrediji kompýuterler sowgat hökmünde gowşuryldy. Şu ýyl Diýarymyzda talyplaryň bolsa 15 müň 326 sanysyny okuwa kabul etmeklik göz öňünde tutuldy. Ylym-bilime höwesek, giň dünýägaraýyşly ýaşlary kemala getirmek maksady bilen okuwa kabul edilýän talyplaryň sanynyň ýylsaýyn artýandygyny ýatlamak gerek. Şu nukdaýnazardan döwletimizde ýaş nesliň ylymly-bilimli bolmaklary, döwrebap okuw sapaklaryny geçmekleri, hünär öwrenmekleri ugrunda giň mümkinçilikler döredilýär.
2022-2023-nji okuw ýyly üçin 22-nji iýulda badalga berlen ýokary okuw mekdeplerine giriş synaglary üstünlikli tamamlandy. Ýaşlar giriş synaglarynda orta mekdeplerde alan bilim gorlaryna görä, üstünlikli çykyş edip, mugallymlaryň beren soraglaryna göwnejaý jogap bermegi başardylar. Ynha, bu gün bolsa olar öz saýlap alan bilim ojaklaryna ilkinji ädimlerini ätdiler. Ýokary okuw jaýlaryna okuwa kabul edilen talyplaryň ýürek joşgunlaryny, begençlerini olaryň hormatly Prezidentimize aýdýan alkyşly sözlerinde, beýan edýän buýsançly jümlelerinde görmek bolýar. Biz hem «Halkyň Arkadagly zamanasy» ýylynda talyp bolmak bagty miýesser eden, şu günki çärelerde ýer alan talyp ýaşlarymyzyň birnäçesiniň ýürek buýsançlaryny size ýetirýäris.
