Ýurdumyzy bagy-bossanlyga öwürmek hormatly Prezidentimiziň üstünlikli durmuşa geçirýän ekologiýa syýasatynyň baş maksadydyr. Şu nukdaýnazardan, ýylda iki gezek — ýaz we güýz pasyllarynda ýurdumyzda agaç nahallaryny köpçülikleýin ekmek asylly däbe öwrüldi. Hormatly Prezidentimiziň başlangyjy bilen geçirilýän bu ekologiýa çäresine dürli ýaşdaky ildeşlerimiz bilen birlikde, ýaşlar hem işjeň gatnaşýarlar. Şonuň netijesinde paýtagtymyz Aşgabadyň daş-töweregi, ýurdumyzyň sebitleri, döwrebap binalaryň, şol sanda bilim ojaklarynyň töweregi bagy-bossanlyga bürelýär, ajaýyp tebigy gözellige eýe bolýar.
Gahryman Arkadagymyzyň we Arkadagly Gahryman Serdarymyzyň ýaş nesillere döwrebap bilim-terbiýe bermek boýunça öňde goýýan wezipeleriniň üstünlikli çözülmegi olara zerur zähmet endiklerini öwretmek, zähmet terbiýesini bermek bilen berk baglanyşyklydyr. Ýaş nesilleriň zähmet terbiýesi ekologiýa terbiýesi bilen utgaşykly alnyp barlanda has-da oňyn netije gazanylýar, sazlaşykly ösýän ýaş nesiller kemala getirilýär.
