Düýn — 17-nji martda Türkmenistanyň Söwda-senagat edarasynda Senagatçylar we telekeçiler birleşmesiniň 15 ýyllygy mynasybetli guralýan sergi hem-de maslahat öz işine başlady. Hususy ulgamyň üstünliklerini şöhlelendirýän gözden geçirilişde birleşmäniň dürli ugurda iş alyp barýan agzalarynyň 200-den gowragy öz önümleri we ýerine ýetirýän hyzmatlary bilen tanyşdyrýar.
Serginiň açylyş dabarasyna Hökümetiň agzalary, Türkmenistanyň Mejlisiniň, ýurdumyzda işleýän diplomatik wekilhanalaryň, ministrlikleriň we pudaklaýyn dolandyryş edaralarynyň, jemgyýetçilik guramalarynyň, ýokary okuw mekdepleriniň hem-de köpçülikleýin habar beriş serişdeleriniň wekilleri gatnaşdy. Sungat ussatlarynyň ýerine ýetiren aýdym-sazly çykyşlary dabarany baýramçylyk ruhuna besledi.
