Hormatly Prezidentimiziň parasatly baştutanlygynda ýurdumyzda ýokary ykdysady ösüşler gazanylýar. Berkarar döwletiň täze eýýamynyň Galkynyşy döwründe, «Halkyň Arkadagly zamanasy» ýylynda intellektual eýeçiligiň ösdürilmegine hem aýratyn üns berilýär. Bütindünýä intellektual eýeçilik guramasy (World Intellectual Property Organization) bu ugurda hereket edýän birnäçe möhüm konwensiýalaryň, maksatnamalaryň işini dolandyrýan halkara guramasydyr. Iňlis, arap, ispan, hytaý, rus, fransuz dilleri Halkara guramanyň resmi dilleri hasaplanylýar. Bu gurama agza her bir ýurt döredijiligi ösdürmek we döwletleriň arasyndaky hyzmatdaşlygyň üsti bilen dünýäde intellektual eýeçiligiň goralmagyny üpjün etmek maksady bilen baglaşylan şertnamalara laýyklykda zerur çäreleri görmäge jogapkärdir. Şeýlelik bilen, guramanyň işi döredijiligi sylaglaýan, innowasiýany höweslendirýän we jemgyýetiň bähbidine ykdysady ösüşe goşant goşýan halkara ulgamyny ösdürmäge niýetlenendir.
Bütindünýä intellektual eýeçilik guramasy Birleşen Milletler Guramasynyň intellektual eýeçiligi ylymda we ykdysadyýetde täzeçil hem-de döredijilikli işläp taýýarlamalary (rugsatnama, awtorlyk hukugy, harytlyk nyşan, nusga) höweslendirmegiň serişdesi hökmünde peýdalanmak meseleleri bilen meşgullanýan gurama bolup durýar. Türkmenistan hyzmatdaşlyk edýän abraýly halkara guramalaryň we düzümleriň çäklerinde, 1995-nji ýyldan bäri doly hukukly agzasy bolup durýan Bütindünýä intellektual eýeçilik guramasy bilen köpugurly gatnaşyklara möhüm ähmiýet berýär.
