Ýaş zehinleriň ýaz joşguny

Bilim
25 Mart 2021
1196

Suratkeşiň dünýäsi täsin dünýä. Onda gözelliklerden gözbaş alýan ajaýyp sungat eserleri döreýär. Bakan ýeriň gözellik eçilýän owadan Diýarymyzyň ajap jemaly, nurana tebigatynda gyşyn-ýazyn açylyp oturan elwan gülleri kalbyňa joşgun berip, döretjek eserleriňe ylham bagyşlaýar. Aşgabat şäher medeniýet müdirliginiň Bäşim Nuraly adyndaky Çagalar çeperçilik mekdebimiziň ýaş zehinleri hem tebigatyň keşbini öz işlerine geçirmekde işjeňlik görkezýärler. Baharyň gelmegi bilen hasam ajaýyp görnüşe eýe bolýan gözel Diýarymyzyň görkana keşbini döredijiliginde wasp edýän okuwçylarymyzyň işleri täze gözlegler bilen baýlaşýar. Çeper döredijiligiň nakgaşçylyk, heýkeltaraşlyk, zergärçilik, halyçylyk ugurlaryndan bilim alýan okuwçylarymyzyň işlerinde Watanymyzyň bedew batly ösüşlerine, gülden görkli tebigatymyzyň ajaýyp görnüşlerine, milli gymmatlyklarymyza buýsanjy, mahlasy, bagtyýar nesilleriň ýürek joşgunlaryny görmek bolýar. Açyk howada surat çekmek dersini okuwçylarymyz bilen paýtagtymyzyň dürli ýerlerinde, seýilgählerde geçmegimiz, ak şäherimiziň gözelliklerini şekillerde täsirli beýan etmäge ýardam berýär. Ýurdumyzyň ajaýyp tebigatyna syýahat etmegiň ýaşlary täze döredijilik gözleglerine atarmak bilen birlikde, olaryň watansöýüji, zähmetsöýer nesiller bolup ýetişmeginde ähmiýeti uly. Okuwçylar bilen muzeýlerimize, taryhy-medeni ýadygärliklerimize gezelençleri gurap durýarys. Şöhratly taryhymyz hakynda gymmatly maglumatlary özünde jemleýän ýerlere gezelençlerden galan täsirleri okuwçylar öz işlerinde beýan edýärler. Ýazyň gelmegi bilen tebigatyň ajaýyp görnüşlerini şekillere geçirýän okuwçylaryň işlerini synlanyňda kalbyň heýjana gelýär. Ýaş zehinleriň döredýän ajaýyp işleri biz mugallymlary buýsandyrýar. Ýaş nesilleriň söýgüsi siňen ol işler, diňe bir ýurdumyzda geçirilýän sergilere däl, eýsem, daşary döwletlerde çagalaryň arasynda geçirilýän döredijilik bäsleşiklerine, halkara sergilere yzygiderli gatnaşdyrylýar. Şol bäsleşiklerde okuwçylarymyzyň üstünliklere eýe bolmagy mekdebimizde ençeme ýyllardan bäri zähmet çekip gelýän mugallymlaryň yhlasynyň netijesidir.

Güljemile AMANOWA,
Aşgabat şäher medeniýet müdirliginiň Bäşim Nuraly adyndaky Çagalar çeperçilik mekdebiniň direktory.
Beýleki habarlar