Güneşli Diýarymyzda azyk bolçulygynyň pugtalanmagyna hususy pudagyň wekilleri saldamly goşantlaryny goşýarlar. Munuň şeýledigine Türkmenistanyň Senagatçylar we telekeçiler birleşmesiniň agzasy «Lezzetli miwe» hojalyk jemgyýetiniň alyp barýan işleri aýdyň mysaldyr.
Kaka etrabynyň çäginden bölünip berlen 200 gektar meýdanda miweli bagyň birnäçe görnüşini ýetişdirip, ondan datlydan ýokumly miwäniň bol hasylyny alýan agzalan hojalyk jemgyýetiniň işleri barha ilerleýär. Etrap häkimliginiň hem-de Türkmenistanyň Agrar partiýasynyň etrap komitetiniň başlangyjy esasynda hojalyk jemgyýetiniň miweli bagynda bolanymyzda bu hakykata buýsanç bilen göz ýetirdik.
