Ýurdumyzda köpugurly ulag düzümini döretmek Berkarar döwletiň täze eýýamynyň Galkynyşy döwründe hormatly Prezidentimiziň durmuşa geçirýän döwlet syýasatynyň ileri tutulýan ugurlarynyň biri bolup duryar. Hormatly Prezidentimiz tarapyndan şu ulgamda öňe sürülýän giň gerimli taslamalar dünýä ýüzünde ykrar edilýär hem-de döwletimiziň bütindünýä ulag-logistika ulgamyna netijeli goşulyşmagyna ýardam berýär.
Häzirki wagtda ählumumy durnukly ösüşiň ulag we aragatnaşyk ugurlarynda halkara hyzmatdaşlygyny ösdürmek örän wajyp wezipe bolup durýar. Berkarar Watanymyz Birleşen Milletler Guramasy bilen hyzmatdaşlygyň çäginde parahatçylygy we durnuklylygy berkitmek, halkara gatnaşyklarda ynanyşmagy, dialogy ilerletmek, ulag diplomatiýasynyň mümkinçiliklerini durmuşa geçirmek bilen bagly köptaraplaýyn bähbitli başlangyçlar bilen çykyş edýär.
