«7/24. tm» № 51 (186) 18.12.2023
Her ýylyň 14-nji dekabrynda ýurdumyzda nebitgaz senagaty we geologiýa pudaklarynyň işgärleriniň hünär baýramy giňden bellenilýär. Arkadag Serdarly bagtyýar ýaşlar ýylynda hem bu sene uly dabaralara beslendi. Hormatly Prezidentimiz Serdar Berdimuhamedow ýurdumyzyň nebitgaz we geologiýa pudagynyň hünärmenlerine hünär baýramy mynasybetli Gutlag hatyny iberdi. Gutlagda pudagyň işgärleriniň ýadawsyz zähmeti netijesinde milli ykdysadyýetimiziň nebitgaz pudagynyň soňky ýyllarda uly üstünliklere eýe bolandygy, pudakda alnyp barylýan öndürijilikli işler esasynda döwletimiziň ýangyç çig malynyň gorlary boýunça dünýäniň öňdebaryjy ýurtlarynyň hataryna goşulandygy aýdylýar. Şeýle-de Arkadagly Serdarymyz: «Kabul edilen döwlet maksatnamalaryna laýyklykda, ýurdumyzda iri senagat toplumlaryny hem-de gaz geçiriji ulgamlaryny döretmek, geljegi uly nebitgaz ýataklaryny özleşdirmek babatda öňde goýlan sepgitlere ýetmek üçin köp işler alnyp barylýar. Hususan-da, Garaşsyz Diýarymyzyň günorta-günbatarynda birnäçe täze nebitli ýataklaryň açylmagyny, Türkmenistan — Hytaý, Gündogar — Günbatar gaz geçirijilerini we gurluşygy alnyp barylýan Türkmenistan — Owganystan — Pakistan — Hindistan gaz geçirijisiniň taslamasyny gazanylan üstünlikleriň hatarynda görkezmek bolar» diýip belläp geçýär.