Berkarar döwletiň täze eýýamynyň Galkynyşy döwründe hormatly Prezidentimiziň ylmy taýdan esaslandyrylan, täzeçil ýörelgeleri maksat edinýän ykdysady syýasatynyň netijesinde döwletimiz sebitde syýasy durnuklylygy saklamakda we oňa goldaw bermekde, hoşniýetli goňşuçylyk, dostluk hem-de hyzmatdaşlyk gatnaşyklaryny ösdürmekde daşary ýurtly maliýe we bank edaralarynyň ygtybarly we netijeli hyzmatdaşyna öwrülýär. Şonuň ýaly-da ýurdumyz tarapyndan Halkara pul gaznasy, Bütindünýä banky, Ýewropanyň täzeleniş we ösüş banky, Aziýanyň ösüş banky, Yslam ösüş banky we beýleki halkara maliýe guramalary we bank edaralary bilen netijeli gatnaşyklaryň giňeldilmegine aýratyn üns berilýär.
Halkara maliýe guramalary we bank edaralary bilen gatnaşyklaryň yzygiderli ýola goýulmagy netijesinde gazanylýan ylalaşyklaryň iş ýüzünde durmuşa geçirilmegi hünärmenleriň halkara derejesinde iş tejribelerine eýe bolmaklaryna we deňhukukly maliýe gatnaşyklarynyň çuňlaşdyrylmagyna getirýär. Halkara hyzmatdaşlygy giňeltmekde we umumadamzat ösüşine dahylly meseleleriň oňyn çözgütlerini tapmakda ýurdumyzyň alyp barýan kämil syýasaty dünýä bileleşigi tarapyndan hem gyzgyn goldaw tapýar.
