Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda halkymyzyň bagtyýar ýaşaýşyna gönükdirilen döwlet maksatnamalary üstünlikli durmuşa geçirilýär. Sanly ykdysadyýeti ösdürmegiň Konsepsiýasynda gündelik durmuşymyza sanly ulgamy ornaşdyrmak, elektron senagatyny döretmek, maglumat aragatnaşyk tehnologiýalaryna esaslanýan hyzmat ulgamyny ýola goýmak wezipeleri göz öňünde tutulandyr.
Sanly serişdeleriň ykdysadyýetiň pudaklaryna ornaşdyrylmagy we ösdürilmegi esasy önümçilik-dolandyryş işleriň ähli görnüşleriniň awtomatlaşdyrylmagyna we merkezleşdirilen tertipde dolandyrylmagyna uly itergi berýär. Şu nukdaýnazardan, ýurdumyzda sanly ulgama esaslanýan bitewi önümçilik we hyzmat ulgamynyň kemala getirilmegi ugrunda işler üstünlikli alnyp barylýar. Häzirki döwürde internet ulgamynyň mümkinçiliklerinden peýdalanmak arkaly dürli hyzmatlar ýerine ýetirilýär.
