Dört dersden olimpiadalar geçirildi
Biziň baýry ýokary okuw mekdebimiz tarapyndan ýurdumyzyň orta mekdepleriniň 11-nji synp okuwçylarynyň arasynda matematika, fizika, himiýa we biologiýa dersleri boýunça internet olimpiadalary geçirildi. Saýlama we jemleýji tapgyrlardan ybarat bolan olimpiadalara ýurdumyzyň dürli sebitlerinden zehinli okuwçylaryň müňden gowragy gatnaşdy. Olaryň iň gowy netije görkezen 250-ä golaýy jemleýji tapgyra gatnaşdyryldy. Paýtagtymyzyň we beýleki welaýatlarymyzyň okuwçylarynyň sanly ulgam arkaly gatnaşan bäsleşiginde ýeňijiler yglan edildi. Şeýlelikde, matematika dersi boýunça geçirilen bäsleşikde paýtagtymyzdaky 135-nji orta mekdebiň okuwçylary Maksat Babageldiýew bilen Hamza Allaberdiýew hem-de Türkmenabat şäherindäki ýöriteleşdirilen 28-nji orta mekdepden Döwletgeldi Şakirjanow beýleki bäsdeşlerinden tapawutlanyp, birinji orna mynasyp boldular. Bäsleşige gatnaşan okuwçylaryň 5-si ikinji, 10-sy bolsa üçünji orunlara mynasyp görüldi.