Ýakynda Özbegistan Respublikasynyň Nöküs şäherinde ýokary okuw mekdepleriniň talyplarynyň arasynda al-Horezmi adyndaky II halkara matematika olimpiadasy geçirildi. Türkmenistandan, Gyrgyzystandan, Gazagystandan, Täjigistandan, Özbegistandan ýokary okuw mekdepleriniň 48-siniň talyplar toparlaryny bir ýere jemlän olimpiada Merkezi Aziýa döwletlerinden ýaş matematikleriň 168-si gatnaşdy.
Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Türkmen döwlet ykdysadyýet we dolandyryş institutynyň, Seýitnazar Seýdi adyndaky Türkmen döwlet mugallymçylyk institutynyň, Telekommunikasiýalar we informatika institutynyň, S.A.Nyýazow adyndaky Türkmen oba hojalyk uniwersitetiniň, Türkmen döwlet binagärlik-gurluşyk institutynyň, Döwlet energetika institutynyň talyplaryndan düzülen toparlar bu olimpiadada ýurdumyza wekilçilik etdiler.
