Şu gün, 5-nji sentýabrda paýtagtymyzyň «Arçabil» myhmanhanasynda Türkmenistanyň Daşary işler ministrliginiň we Türkmenistanyň Telewideniýe, radiogepleşikler we kinematografiýa baradaky döwlet komitetiniň bilelikde guramagynda «Garaşsyz Türkmenistan halkara habarlar giňişliginde» atly halkara maslahat geçirildi. Forum 2 tapgyrda geçirilip, oňa daşary ýurt habarlar agentlikleriniň wekilleri, žurnalistler, ýurdumyzyň köpçülikleýin habar beriş serişdeleriniň redaktorlary, ýokary okuw mekdepleriniň žurnalistika hünäri boýunça bilim alýan talyp ýaşlary hem-de ugurdaş düzümlerden ýolbaşçylar gatnaşdylar.
Köpçülikleýin wideoaragatnaşyk arkaly geçirilen bu foruma gatnaşyjylar ilki bilen, ýurdumyzyň Garaşsyzlygynyň 31 ýyllygyna bagyşlanyp gurnalan sergini synladylar. Bu ýerde milli we daşary ýurt nusgawy aýdym-sazlar, çykyşlar ýerine ýetirildi. Soňra halkara maslahat öz işine başlady. Çykyşlar türkmen, iňlis we rus dillerinde alnyp baryldy.
