Hyzmatdaşlygyň täze gözýetimlerini döretmek, ulag arkaly özara baglanyşygy ösdürmek ugrunda ýurdumyzda alnyp barylýan çäreler belent maksatlara ýetmegiň serişdesi hökmünde öňe çykýar. Şu nukdaýnazardan düýn, 22-nji awgustda Türkmenistanyň Telewideniýe, radiogepleşikler we kinematografiýa baradaky döwlet komitetinde halkara derejesindäki «Türkmenistanyň halkara başlangyçlary: hyzmatdaşlygyň täze gözýetimleri» atly mediaforum geçirildi. Mediaforuma daşary ýurt habarlar agentlikleriniň wekilleri, žurnalistler, ýurdumyzyň köpçülikleýin habar beriş serişdeleriniň redaktorlary, žurnalistler hem-de ugurdaş düzümlerden ýolbaşçylar gatnaşdylar.
Köpçülikleýin wideoaragatnaşyk arkaly geçirilen bu mediaforumda özara hyzmatdaşlygy ösdürmekde, Durnukly ösüşiň maksatlaryna ýetmek bilen baglanyşykly wezipeleri çözmekde ädilen möhüm ädimleriň ençemesi agzalyp geçildi. Ýaňy-ýakynda «Awaza» milli syýahatçylyk zolagynda üstünlikli geçen deňze çykalgasy bolmadyk ösüp barýan ýurtlaryň ulag ministrleriniň ýokary derejedäki halkara maslahatyň jemlerine bagyşlanan bu mediaforumda çykyş eden onlarça döwletleriň wekilleri özleriniň degişli ulag-logistika, awtomobil we demir ýol düzümleriniň täze taslamalary, agrosyýahatçylyk bilen bagly birnäçe ugurlara ünsi çekdiler. Mediaforum türkmen, iňlis, rus dillerinde geçirilip, ýurdumyzda geçirilen halkara maslahatyň ähmiýeti, uzak geljegi nazarlaýan täze başlangyçlaryň öňe sürülmegi, teklipleri taýýarlamak, gatnaşyklaryň ugurlaryny kesgitlemek dogrusynda hem ençeme meselelere garaldy.
