Türkmen sporta, bedenterbiýä, mahlasy, sagdynlyk ýörelgelerine aýratyn ähmiýet berýän halk. Her bir döwletiň syýasy ýörelgelerinde öňe sürülýän başlangyçlaryň aýratynlygy döwrüň gadamy esasynda ýurduň ösüşini kesgitleýär. Milli Liderimiziň tagallalarynyň netijesinde döwlet syýasatynyň ileri tutulýan ugurlarynyň birine öwrülen sport, sagdynlyk ýörelgeleri bu gün rowaçlyklara beslenýär. Türkmen türgenleri dünýäniň dürli künjeklerinde geçirilýän ýaryşlaryň baýraklaryndan mynasyp paýyny alyp, türkmen Tuguny arşa göterdýärler.
Türkmen sportunyň şu günki ýeten derejesi barasynda söhbet açylanda, milli sportumyzdaky ýene bir taryhy wakanyň halkymyzyň kalbynda guwanç duýgusyny oýarandygyny bellemek zerurdyr. Ýer ýüzüniň iň iri ýaryşynyň — Ýaponiýanyň paýtagty Tokioda geçirilen nobatdaky XXXII Bütindünýä Olimpiýa oýunlarynyň türkmen halkyna uly şatlygy bagyş edendigi eýýäm hemmämize mälimdir. Bu abraýly sport baýramynda türkmen sporty üçin ilkinji olimpiýa medalyny gazanan Türkmen döwlet bedenterbiýe we sport institutynyň 5-nji ýyl talyby Polina Gurýewany bu Olimpiadanyň esasy gahrymanlarynyň biri hasaplamak bolar. Polinadyr onuň tälimçilerini sylaglamak dabarasy hem aýratyn täsirliligi bilen halkymyzyň buýsanjyny artdyrdy. Polina Gurýewa «Türkmenistanyň at gazanan sport ussady» diýen hormatly adyň dakylmagy, şeýle-de oňa paýtagtymyzdan ähli amatlyklary bolan üç otagly öýüň we ak reňkli «Lexus LX570 Sport Plus» kysymly awtoulagyň açarlarydyr 50 müň amerikan dollary möçberinde pul baýragynyň gowşyrylmagy arzuwlary hasyl bolan sport janköýerlerimize ýapylan Şa serpaýy boldy. Polinanyň tälimçileriniň — Türkmenistanyň Sport we ýaşlar syýasaty ministrliginiň Türkmenistanyň Ýokary sport ussatlygy mekdebiniň agyr atletika bölüminiň tälimçi-mugallymy A.Saryýewiň «Garaşsyz Türkmenistana bolan beýik söýgüsi üçin» diýen ordeni, şol mekdebiň agyr atletika bölüminiň tälimçi-mugallymy A.Emirýanyň bolsa 2021-nji ýylda öndürilen, ak reňkli «Toyota Camry» kysymly ýeňil awtoulag bilen sylaglanmagy Gahryman Arkadagymyzyň halypa-şägirtlik ýoluna berýän ünsüniň belentdiginiň subutnamasydyr.
