Ähli ugurlar boýunça uly üstünliklere beslenýän «Pähim-paýhas ummany Magtymguly Pyragy» ýylynyň 19-njy noýabryndan 5-nji dekabry aralygynda Türkmenistanyň Bedenterbiýe we sport baradaky döwlet komitetiniň Sport mekdebi tarapyndan Halkara bitaraplyk güni mynasybetli 2010 — 2014-nji ýyllarda doglan ýetginjekleriň arasynda şaýbaly hokkeý boýunça sport mekdebiniň açyk birinjiligi geçirildi.
Aşgabat şäherindäki Gyşky oýunlar sport toplumynda Türkmenistanda şaýbaly hokkeýi ösdürmek, wagyz etmek, ýaş hokkeýçileriň ussatlygyny kämilleşdirmek, ýaşlary höweslendirmek, sporta çekmek, iň güýçli toparlary hem oýunçylary kesgitlemek maksady bilen geçirilen ýaryş diýseň gyzykly we çekeleşikli geçdi. Açyk birinjilige «Türkmengaz» döwlet konserniniň «Türkmengazawtomatika» müdirliginiň «Oguzhan» hokkeý klubunyň ýetginjek türgenleri hem gatnaşdy. Mälim bolşy ýaly, «Oguzhanyň» oýunçylary ýurdumyzyň iň güýçli türgenleriniň hatarynda durýar. Gazçylaryň topary bu gezek hem ýaryşda öz ussatlygy bilen tapawutlanmagyň hötdesinden geldi. Netijede, «Oguzhan» topary ähli garşydaşlaryndan ynamly ýeňişler bilen üstün çykdy we 1-nji ýeri eýeledi hem-de açyk birinjilikde hormat hatyna, kuboga mynasyp boldy.
