Magtymguly Pyragynyň ady bu gün dünýäniň çar künjeginde tanalýar. Şahyryň goşgulary ynsanyň milletine, diline, ýaşyna garamazdan, onuň kalbyna aralaşyp, ony özüne maýyl edýär.
Magtymgulynyň goşgularyna taryhy çeşme hökmünde seretsek, taryhy çeşmeşynaslygyň ilki we esasy talaplaryna üns bermegimiz gerek. Ilki bilen, taryhy çeşme näme?! Bolup geçen islendik zat barada maglumat berip bilýän islendik zat çeşmedir. Ondan edilýän talap çeşmeleriň adamlar tarapyndan döredilip, adamzat barada habar berip bilmegidir. Ýöne çeşmeşynaslygyň diňe ýazuw, özi hem ilkinji çeşmeleri öwrenýändigini bellemegimiz gerek.
