Golaýda paýtagtymyzda telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2024» atly XVII halkara sergisi we ylmy maslahat geçirildi. Giň gerimli sergide aragatnaşyk, telekommunikasiýa pudagynda uzak möhletleýin geljege gönükdirilen döwlet maksatnamalaryny hem-de taslamalary üstünlikli durmuşa geçirýän ýurdumyzyň aragatnaşyk düzümleri we olaryň daşary ýurtly hyzmatdaşlary öz diwarlyklaryny ýaýbaňlandyrdylar. Bu kompaniýalar sanly ykdysadyýet, kiberhowpsuzlyk, telekommunikasiýa, maglumat we kompýuter tilsimatlary, hemra aragatnaşyk ulgamynyň enjamlary, bu ugurda gazanylanlar bilen tanyşdyrdylar. «Sanly geçiş: halkara dialoga we hyzmatdaşlyga ýardam etmek» atly umumy mejlisde pudaklaýyn düzümleriň ýolbaşçylarydyr wekilleri häzirki zaman telekommunikasiýalar ulgamlarynyň, maglumat üpjünçiliginiň ýagdaýyna syn, olaryň geljekki ösüşine we mümkinçiliklerine baha berdiler. Ylmy maslahat «Kommunikasiýalaryň geljekki çäkleri», «Hemra tehnologiýalary, gollanmalary we hyzmatlary: durnukly ykdysadyýetiň goldawydyr», «Etiki, inklýuziw sanly jemgyýetleri döretmek: durnukly sanlylaşmagyň strategiýasy» atly bölümçelerde hem geçirildi.
Halkara forumyň çäklerinde Türkmenistanda sanly ykdysadyýeti ösdürmekde programma üpjünçiligini işläp düzýän we innowasion oýlap tapyşlar, startaplar bilen meşgullanýan ýaşlary ýüze çykarmak hem-de höweslendirmek maksady bilen guralan «Sanly çözgüt — 2024» atly innowasion taslamalaryň nobatdaky bäsleşiginiň jemleri jemlenilip, ýeňijileri sylaglamak dabarasy boldy.
