Ýurdumyzyň demirgazyk sebitinde maýsaly meýdanlarda ideg işleri gyzgalaňly dowam edýär. Ýaş maýsalary mineral dökünler hem-de olaryň baldagy boýlap, köki berkär ýaly ýerli dökünler bilen iýmitlendirmek çäreleri geçirilýär. «Pähim-paýhas ummany Magtymguly Pyragy» ýylynda daýhançylyk üçin örän amatly hem garaşykly gelen sahawatly güýz paslynyň häzirki günlerinde ýokary hil derejesinde, toplumlaýyn esasda amal edilýän şeýle agrotehniki çäreler geljek ýylda galla hasylynyň bol boljakdygyna ynam döredýär.
Şu ýyl welaýatyň ähli etraplarynda ekiş geçirilen ýerlerde kadaly gögeriş alyndy. Ýaş maýsalara ideg işlerini günsaýyn ýokarlandyrmak boýunça degişli taýýarlyklar hem görüldi. Şu günler amal edilýän her bir iş, agrotehnikanyň talaplaryna laýyklykda geçirilýän her bir çäre öz netijesini hem berýär. Bu çäreler bilen utgaşyklylykda bugdaýly meýdanlara suw tutmak işleri-de gyzgalaňly dowam edýär. Şabat etrabynyň S.Rozmetow adyndaky oba hojalyk paýdarlar jemgyýetinde bu işler daýhançylygy ýöretmegiň usullaryna laýyklykda hem-de ylmy esasda alnyp barylýar. Görogly etrabynyň Magtymguly adyndaky, Boldumsaz etrabynyň «Türkmenistan», Akdepe etrabynyň gallaçylyga ýöriteleşdirilen «Babadaýhan», Şabat etrabynyň «Nowbahar» daýhan birleşikleri hem bugdaýa ideg işlerini geçirmekde öňde barýarlar. Welaýat boýunça 145 müň gektar meýdanda ekiş geçirilip, 265 müň tonna ak bugdaý öndürmek göz öňünde tutulýar. Şu ýylyň ekiş möwsümini bellenilen möhletlerde geçirmek üçin dürli kysymly traktorlaryň 2300-si, ekijileriň 520-den gowragy sazlaşykly işledildi. Welaýatyň Şabat, Görogly, Akdepe etraplary ekişde öňdäki hatarda boldular. Şu etraplaryň ak ekin ussatlary bugdaýa ideg işlerini geçirmekde hem ýokary netijeler gazanyp, öňdeligi eýeleýärler. Şabat etrabynda 16 müň gektar meýdanda bugdaý ekişini geçirmekde kuwwatly traktorlaryň her gün 30-a golaýy, 15 müň 500 gektarda bu gymmatly azyk önümini ýetişdirýän Görogly etrabynda şeýle tehnikalaryň 21-si sazlaşykly hereket etdi.
