Döwlet Baştutanymyzyň ýurdumyzda azyk bolçulygyny döretmek ugrunda durmuşa geçirýän taýsyz tagallalaryndan ruhlanyp, işlerini kämil derejede guraýan kärhanalaryň hatarynda Köýtendag etrabyndaky Dostluk galla önümleri kärhanasy hem aýratyn tapawutlanýar. Bu ýerde gallaçy babadaýhanlarymyzyň ene topragymyzda ýetişdiren guşgursak bugdaýyny gaýtadan işläp, ondan un öndürmekde netijeli işler alnyp barylýar.
1998-nji ýylda işe başlan bu kuwwatly kärhana häzirki wagtda haraz, elewator, ammar, önümleriň hilini kesgitleýji we energiýa üpjünçiligi, abatlaýyş ýaly bölümlerden ybarat bolup, bu ýerde hünärmenleriň 300-si yhlasly zähmet çekýär. Önümçilikde uly degirmenleriň 5-siniň güýjünden peýdalanylýar.
