Tebigy hadysalardan çen tutan parasatly ata-babalarymyz durmuşda özleriniň ýaşaýyş şertlerinden başarjaňlyk bilen peýdalanypdyrlar. Gadymdan gelýän Aý-Gün, ýyldyz senenamalary boýunça tebigy hadysalara taýýarlyk görüpdirler. Möwsümleýin işlerini tebigatyň şertlerine görä, hasaply alyp barypdyrlar. Halkymyzda şol senenamanyň biri akrap ýyldyz hasabydyr. Akrap möwsümi güýzki deňleşik — mizan döwründen soň gelýär, ol 23-nji oktýabrdan başlanyp, 22-nji noýabra çenli dowam edýär.
Akrapda maýyl howaly günler sabaşýar. Bereketli güýz paslyna mahsus baly goýalyşan ir-iýmişler, gawun-garpyz, kädi ýaly bakja, mäş, noýba-nohut we bürünç ýaly, kösükli ekinleriň giçki görnüşleri ýetişýär. Bu döwür daýhanlaryň azap bilen ýetişdiren hasyllaryny gyşa galdyrmazlyk üçin ýygymyň gyzgalaňly wagtydyr. Olar ýylboýy azaplaryny reýgana çykarmazlyk üçin tijenýärler. Akrap möwsüminde ýere çyg düşüp, howa sowaýar, toprak gyrawlaýar. Bu alamatlar bolsa aýazly gyşyň geljeginiň habarçysydyr.
