Mälim bolşy ýaly, 16-njy martda ählihalk bag ekmek dabarasy geçirildi. Ýurdumyzy bagy-bossanlyga öwürmek maksady bilen geçirilýän bu dabara indi asylly däbe öwrüldi. Köpçülikleýin bag ekmek dabaralarynyň netijesinde, bagy-bossanly ýurdumyz has-da gözel keşbe eýe boldy. Häzirki wagtda türkmen topragynda saýaly we miweli agaçlaryň dürli görnüşlerini görmek bolýar. Halkymyzda bag ekmek asylly däpleriň biridir. Şonuň üçin hem tebigatyň gözelligini üpjün edýän baglar uly ähmiýete eýe bolup durýar. Bereketli ene toprak ekilýän bag nahallaryndan gülleýär we gözel keşbe eýe bolýar. Muňa raýatlarymyzyň uly ruhubelentlik bilen gatnaşan bag ekmek dabarasynyň my-salynda hem aýdyň göz ýetirdik. Bagtyýar adamlar irgözinden, uly ruhubelentlik bilen ýaýylyp ýatan meýdanlara çykdylar. Olaryň her biri bag nahalyny oturdyp, ene topragynyň güllemegine, gözel keşbe eýe bolmagyna öz goşandyny goşdy. Ildeşlerimiziň şeýle asylly maksatlarynyň netijesinde, ene topragymyz özgerýär, gözelleşýär.
Şol gün ýurdumyzyň bilim işgärleri hem säher bilen ýaşyl don geýnen meýdanlara çykdylar, bu çärä mynasyp goşantlaryny goşdular. Bu biziň ählimizi begendirýär. Adamlaryň yhlasly zähmeti bilen umumy öýümiz bolan tebigatyň we daşky gurşawyň arassalygy üpjün edilýär. Şonuň netijesinde müňlerçe gektara uzaýan tokaý zolaklarynyň dörändigini, saýaly we pürli agaçlaryň gözel keşbini görýäris. Bu bolsa tebigatyň özgermegine oňat täsirini ýetirýär.
