Maşgala türkmen halkynda hemişe-de mukaddes öý, keramatly ojak, döwletiň içindäki kiçijik döwlet hasap edilipdir. Maşgala gatnaşyklary babatda hem halkymyzda asyrlardan-asyrlara aşyp gelýän medeni gymmatlyklar, ahlak düzgünleri kemala gelipdir.
Maşgala diňe bir hukuk gatnaşyklarynyň däl, ilkinji nobatda, söýginiň, hormatyň we beýleki ahlak kadalarynyň binýadynda döredilýär. Türkmen maşgalasynda hereket edýän bir-birege hormat goýmak, ulyny sylamak, kiçini söýmek, ene-atanyň sözüni ýykmazlyk, gelniň ýaşmak ýaşynmagy, gyzyň edaly bolmagy ýaly kämil ýörelgeler bar.
