Türkmenistan bir mizemez daragtdyr
«Türkmenistan Sport», № 4 (20), 2023 Döwletli döwran dolanan çagy durmuş durşy bilen düre dönýär. Bu bagtyýar barlygyň her bir zerresi bady-sabanyň owazynda ýaňlanýan bagt hakyndaky mukam bolup, bahasyna ýetip bolmajak baýlyga barabardyr. Şeýle ajaýyp, eşretli zamananyň goýnuna ataran, ata ýurdumyzyň sarsmaz dag deý arkasy bolan Gahryman Arkadagymyzyň belent ady Berkarar döwletiň täze eýýamynyň Galkynyşy döwründe Arkadagly Serdarymyz tarapyndan durmuşa geçirilip, dünýä dolýan beýik işleriň, Türkmenistanyň okgunly ösüşiniň özboluşly şöhlelenmesine, ruhlandyryjysyna öwrüldi. Çünki her bir ýetilen sepgitde Milli Liderimiziň taýsyz tagallalaryny aýdyň görmek bolýar. Sebitde we ýurdumyzda ilkinji «akylly» şäher bolan Arkadag şäherine, şonuň bilen adybir gazete, teleýaýlyma Milli Liderimiziň adynyň dakylmagynda agzybir, jebis halkymyzyň Hak howandaryna bolan bimöçber söýgüsi öz beýanyny tapýar. «Arkadag» futbol toparynyň gazanýan ýeňişleriniň aňyrsynda hem Milli Liderimiziň adynyň ruhy goldawy, berk ynamy bar.