Basketbolda iki ýaryşda-da ozaldanam belli bolşy ýaly, amerikalylara taý tapylmady. Erkekleriň arasynda ABŞ-nyň ýygyndysy finalda Fransiýadan 87:82 üstün çykdy. Toparçadaky oýunda 83:76 asgyn gelen ABŞ Olimpiýa oýunlarynda 17 ýyldan soň ýeňlipdi. Ýöne muňa garamazdan, finala çykan ABŞ-nyň ýygyndysy yzly-yzyna 4-nji, umumylykda-da 16-njy gezek Olimpiýa altyn medalyna mynasyp boldy. Toparyň ýyldyzy Kewin Durant 3-nji altyn medalyny boýnuna dakyp, Karmelo Antoniniň rekordyny gaýtalady.
Zenanlaryň arasynda ABŞ-nyň ýygyndysy yzly-yzyna 7-nji, umumylykda 9-njy altyn medalyny gazandy. Olar finalda Ýaponiýanyň ýygyndysyny 90:75 hasabynda ýeňlişe sezewar etdi. Amerikaly gyzlar Olimpiýa oýunlarynda diňe 3 gezek çempion bolup bilmediler. 1976-njy, 1980-nji ýyllarda ozalky SSSR hem-de 1992-nji ýylda GDA-nyň hataryna girýän döwletleriň Birleşen topary çempionlyk gazanypdy.