Berkarar döwletiň täze eýýamynyň Galkynyşy döwründe hokkeý ýaşlaryň köpçülikleýin saýlap alýan sport görnüşleriniň birine öwrüldi. Ýetginjekler boýunça milli ýygyndymyz mart aýynda Günorta Afrika Respublikasynyň Keýptaun şäherinde Gonkongyň, Tailandyň we GAR-yň toparlarynyň gatnaşmagynda «B» toparyň üçünji diwizionynyň dünýä çempionatynda çykyş edip, kümüş medala mynasyp boldy. Milli ýygynda «Galkan» hokkeý toparynyň ýaşlar ýygyndysynyň tälimçisi Guwançmyrat Jepbarow tälimçilik etdi. Şeýle hem ýaşlaryň bu ýaryşda üstünlikli çykyş etmeginde kömekçi tälimçi Maksat Ataýewiň uly goşandynyň bardygyny bellemek gerek. Türkmenistanyň milli ýygyndysyna Içeri işler ministrliginiň «Galkan», Söwda we daşary ykdysady gatnaşyklar ministrliginiň «Şir» we «Türkmengaz» Döwlet konserniniň «Oguzhan» toparlaryndan ýaş hokkeýçileriň 20-si wekilçilik etdi.
Ýetginjekler toparynyň düzüminde çykyş eden mekdep okuwçylaryndan Serdar Durdyýewiň, Isgenderhan Durdyýewiň, Elman Isaýewiň, Soltanhamit Wahytowyň, Şöhrat Begliýewiň atlaryny agzamak bolar. Türkmenistanyň ýetginjekler ýygyndysynyň oýunçysy Elman Isaýew çempionatyň iň gowy oýunçysy hökmünde saýlandy. Serdar Durdyýew bolsa bir oýunda dört şaýba geçirip, ýokary netije görkezdi.
