Hormatly Prezidentimiziň baştutanlygynda uly ösüşleriň aýdyň ýoly bilen beýik sepgitleri nazarlaýan bagtyýar halkymyz eşretli zamanymyzyň hözirini görüp ýaşaýar. Eşretli zamanamyzyň bagtly ýaşlary bolsa, Gahryman Arkadagymyzyň, Arkadagly Gahryman Serdarymyzyň saýasynda halkara ölçeglerine laýyk gelýän iň täze tehnologik enjamlar bilen enjamlaşdyrylan döwrebap orta, orta hünär we ýokary okuw mekdeplerinde okap bilim alýarlar. “Döwlet adam üçindir!” diýen belent şygary baýdak edinip, geljegimiz bolan ýaşlaryň islän hünärleri boýunça bilim almaklary üçin ýurdumyzda giň mümkinçilikler döredilýär. Orta hünär we ýokary okuw mekdeplerine kabul edilýän talyplaryň sany ýyl-ýyldan artýar. Bularyň ählisi ajaýyp döwrümiziň bagtyýar nesilleri üçin eşretli durmuşda ýaşamagy, sagdyn ösmegi, oňat okamagy, il-ýurdumyza abraý getirjek ökde hünärmenler bolup ýetişmegi üçin zerur şertleri döredip berýän Gahryman Arkadagymyzyň taýsyz tagallalaryndan nyşandyr.
Häzirki wagtda ýaşlar baradaky döwlet syýasatyny durmuşa geçirmekde toplumlaýyn işler alnyp barylýar. Häzirki döwürde maglumat we kommunikasiýa ulgamlary, kompýuter tehnologiýalary bütin dünýäde has depginli ösýän ugurlary bolup durýar. Munuň özi ýokary tehnologiýaly pudaklar, nazary we amaly bilimler, maglumat tehnologiýalary dünýä ykdysadyýetiniň hil taýdan täze belentlige çykmagyna gönüden-göni täsir edýär. Şunuň bilen baglylykda maglumat tehnologiýalaryndan baş çykarýan hünärmenleriň täze neslini taýýarlamak döwrümiziň möhüm wezipeleriniň biri bolup durýar. Ýurdumyzyň milli bilim ulgamyna sanly serişdeleriň, öňdebaryjy kompýuter tehnologiýalarynyň we multimedia enjamlarynyň ornaşdyrylmagy ösüp gelýän ýaş nesle berilýän bilimiň hilini ýokarlandyrmga we mazmunyny baýlaşdyrmaga oňyn täsirini ýetirýär.
