Kaka etrap häkimliginiň mejlisler jaýynda “Aýdyň maksatlar ýollarymyza şamçyrag” şygary astynda wagyz-nesihat maslahaty geçirildi. Türkmenistanyň Kärdeşler arkalaşyklarynyň etrap birleşmesiniň we beýleki jemgyýetçilik guramalary tarapyndan guralan maslahat şanly Garaşsyzlygymyzyň 33 ýyllygyna we Türkmenistanyň Halk Maslahatynyň jemgyýetçilik-syýasy ähmiýetine bagyşlandy.
Maslahatdaky çykyşlarda bellenilişi ýaly, demokratik, hukuk we dünýewi döwletimizde halk häkimýetini amala aşyrmakda, durnukly durmuş-ykdysady ösüşi, halkyň bagtyýar durmuşyny üpjün etmekde Türkmenistanyň Halk Maslahatynyň işiniň uly ähmiýeti bar. Garaşsyzlyk ýyllarynda gazanylan üstünlikleri berkitmekde, döwletimiziň hukuk esaslaryny dünýä tejribesine laýyklykda kämilleşdirmekde, jemgyýetde demokratik däpleri pugtalandyrmakda, halkyň ýokary durmuş derejesini üpjün etmekde Halk Maslahatynyň mejlislerinde kabul edilýän çözgütler möhüm ähmiýete eýedir.
