Hormatly Prezidentimiziň ýurdumyzda amala aşyrýan bilim özgertmelerini durmuşa ornaşdyrmakda döredijilikli zähmet çekýän, hünärine ussat bilim işgärlerini ýüze çykarmak, olaryň iş tejribesini ýaýratmak hem-de ýaş nesle berilýän bilimiň hilini we netijeliligini ýokarlandyrmak maksady bilen welaýatymyzda giň gerimli işler durmuşa geçirilýär. Mekdebe çenli çagalar edaralarynyň işgärleriniň gatnaşmaklarynda geçirilýän okuw-görkezme esbaplarynyň sergisi hem şeýle çäreleriň biridir.
Düýn welaýat baş bilim müdirliginiň guramagynda Türkmenabat şäherindäki 40-njy çagalar bakja-bagynyň binýadynda okuw-görkezme esbaplarynyň sergisi guraldy. Oňa öňdebaryjy bilim işgärleri öz taýýarlan işlerini hödürlediler. Sergide has tapawutlanan bilim işgärleri welaýat baş bilim müdirliginiň Hormat haty bilen sylaglanyldy.