Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalary bilen eziz Diýarymyz uly ösüşlere eýe bolýar. Ýurdumyzda beýleki ugurlar bilen bir hatarda, ylym-bilim ulgamynyň ösdürilmegine-de uly ähmiýet berilýär. Şonuň netijesinde ýurdumyzyň ylym-bilim edaralarynda okuw-terbiýeçilik işleri kämilleşdirilýär, bilim özgertmeleri üstünliklere beslenýär.
Mekdebe çenli bilim hem-de terbiýe bermegiň usulyýeti, okuw maksatnamalary, okuw kitaplary we gollanmalar yzygiderli kämilleşdirilýär. Mekdebe çenli çagalar edaralarynyň bilim işgärleriniň hünär derejesi yzygiderli ýokarlandyrylýar. Maşgalanyň, bilim ojaklarynyň hem-de jemgyýetçilik guramalarynyň özara sazlaşykly gatnaşyklaryny pugtalandyrmak maksady bilen, maksatnamalaýyn işler ýola goýulýar. Hormatly Prezidentimiz ýurdumyzyň bilim ulgamyny döwrebaplaşdyrmaga, bu ugry yzygider ösdürmäge, ösen ýurtlaryň tejribesini öwrenmäge we ornaşdyrmaga giň mümkinçilikleri döredýär.
