Geçen anna güni Aşgabat şäherindäki daşary ýurt dilleri çuňlaşdyrylyp öwredilýän ýöriteleşdirilen 129-njy çagalar bagynda şäheriň mekdebe çenli çagalar edaralarynyň terbiýeçi-usulyýetçileriniň gatnaşmagynda usuly-amaly okuw geçirildi. Bu usuly-amaly okuwda şu çagalar bagynyň terbiýeçisi Maýsa Babaýewa uly (mekdebe taýýarlaýyş) toparyň körpeleri bilen adaty däl görnüşde «Sözleýşi ösdürmek» sapagyny gurady. Terbiýeçi körpeler bilen «Sabyrly bol!» ertekisini sahnalaşdyryp, ertekiniň gahrymanlarynyň şekillerini suratlandyryp, sapagy täsirli gurady.
Şu çagalar bagynyň rus dili mugallymy Raisa Karadjaýewa uly (mekdebe taýýarlaýyş) toparynda interaktiw tagtada sapagy döwrebap, okuw maksatnamasyna laýyklykda, usuly taýdan işjeň, dürli görnüşli owadan reňkli esbaplardan peýdalanyp, talabalaýyk we täsirli guramagy başardy.
