Dünýä ýüzünde günsaýyn özgerýän ylmyň, bilimiň, tehnologiýanyň ýeten derejesini özleşdirmek, ony milli tejribede durmuşa geçirmek soňky ýyllaryň iň möhüm ugurlarynyň hatarynda öňe çykdy. Şoňa görä-de, ýurdumyzda bilim edaralarynyň işini kämilleşdirip, ulgamlaýyn alyp barmak, okuw meýilnamalaryny, kitaplaryny ösen halkara tejribelere laýyklykda döwrebaplaşdyrmak boýunça netijeli işler geçirilýär. Ýaşlar baradaky döwlet syýasatynyň 2025-nji ýyla çenli döwür üçin döwlet maksatnamasy esasynda taryhymyzy, medeniýetimizi hem-de däp-dessurlarymyzy oňat bilýän, olara baha bermegi başarýan şahsyýetleri kemala getirmek babatda-da giň gerimli işler amala aşyrylýar.
Ýaşlaryň durmuş-ykdysady we syýasy hukuklaryny kepillendirýän «Ýaşlar barada döwlet syýasaty hakynda» Türkmenistanyň Kanunynyň rejelenen görnüşi kabul edildi. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Halk Maslahatynyň Prezidiumynyň 2023-nji ýylyň 31-nji oktýabrynda geçirilen mejlisinde bilim ulgamyny mundan beýläk-de ösdürmek barada beren tabşyryklaryna esaslanyp, Döwlet çeperçilik akademiýasynda degişli ugurlar boýunça ýaş hünärmenleriň taýýarlygy yzygiderli ýokarlandyrylýar.