Kaka etrabynda güýzlük däne ekilen meýdanlara ideg etmek işleri sazlaşykly alnyp barylýar. Etrabyň daýhan birleşikleri boýunça üstümizdäki şanly ýylyň hasyly üçin 41 müň gektarda däne ýetişdirilýär. Barha boý alýan we bol hasyla durýan maýsaly meýdanlarda ösüş suwuny tutmak, mineral dökünler bilen iýmitlendirmek ýaly çäreler agrotehnikanyň kadalaryna laýyk derejede ýerine ýetirilýär. Munuň özi ekiniň bol hasyl toplamagyna oňaýly täsirini ýetirýär.
Häzirki agrotehniki çäreleri alyp barmakda etrabyň «Parahat», A.Tahyrow adyndaky daýhan birleşikleriniň gallaçy kärendeçileri has yhlasly işleýärler. Maýsalary mineral dökünler bilen iýmitlendirmek ýaly möhüm işde oba hojalyk tehnikalaryna başarjaňlyk bilen erk edýän mehanizatorlar işjeňlik görkezýärler. Etrapda tehnikalary galla oragyna taýýarlamak işleri hem utgaşykly alnyp barylýar. Bu babatda etrabyň Tehniki hyzmat ediş kärhanasynyň bejeriji ussalary tarapyndan ýerine ýetirilýän işler bellenilmäge mynasypdyr.
