Agrotehnikanyň kadalarynyň dogry berjaý edilmegi geljekki hasylyň ykbalyny kesgitleýär
Hormatly Prezidentimiz oba hojalyk ekinleriniň ekişini we idegini elmydama ylmy esasda — agrotehnikanyň kadalaryna laýyklykda alyp barmagy yzygiderli talap edip gelýär. Şu ýylyň gowaça ekişi hem agrotehnikanyň talaplaryna laýyklykda üstünlikli geçirilýär. Ekerançylyk meýdanlary, ekişde ulanyljak tehnikalar möhüm möwsüme birkemsiz taýýarlanyldy. «Türkmenistan — parahatçylygyň we ynanyşmagyň Watany» ýylynda hem welaýatymyzyň zähmetsöýer pagtaçylary 130 müň gektarda gowaça ekmegi meýilleşdirdiler. Bu işe hormatly Prezidentimiziň ak pata bermegi bilen başlangyç berildi. Ekişiň möhletiniň dogry saýlanylyp alnandygyny aýdasymyz gelýär. Ir, endigan gögeriş almak üçin bu möhlet örän amatly hasap edilýär. Sebäbi yssy howanyň başlanmagy bilen topragyň ýokarky gatlagy tiz guraýar, tohumyň gögermegi hem-de ösmegi üçin şol gatlakda ýeterlik çyglylyk galmaýar. Gowaçanyň ýylylygy söýýän ösümlikdigi we ösüşiniň birinji döwründe kadaly boý almagy, ösmegi üçin 20-25 gradus ýylylygyň gerekdigi hem göz öňünde tutulmalydyr.
