Berkarar döwletimiziň bagtyýarlyk döwründe hormatly Prezidentimiziň çuň parasaty bilen halkymyzyň ajaýyp däp-dessurlary, baýramçylyklary we toý-dabaralary täze many-mazmuna eýe boldy. Ruhy-medeni gymmatlyklarymyz asyrlaryň dowamynda halkymyzyň kalbynda hasyl bolan arzuwlaryň özboluşly beýanyna öwrüldi. Milli Liderimiziň taýsyz tagallalary bilen ruhy-edebi we taryhy-medeni mirasymyzy öwrenmek, milli medeniýetimizi ösdürmek boýunça edilýän ähli işler giň gerimli özgertmeler syýasatyndan gözbaş alýar. Halkara Nowruz baýramçylygy, ilkinji nobatda, tebigatyň täzelenişini, topragyň janlanyşyny, ekerançylyk işleriniň başlangyjyny äleme äşgär edýär.
Hormatly Prezidentimiziň medeni syýasaty halkymyz tarapyndan müňýyllyklaryň jümmüşinde döredilip, biziň günlerimize çenli gelip ýeten milli mirasymyzy, däp-dessurlarymyzy, şol sanda Halkara Nowruz baýramynyň gyzykly däplerini gorap saklamaga, ylmy taýdan çuňňur öwrenmäge, döwrebap öwüşginler bilen dikeltmäge gönükdirilendir. Hormatly Arkadagymyzyň tagallasy bilen ýurdumyzda milli mirasymyzyň dürdäne gymmatlyklaryna bagyşlanan halkara festiwallaryň, sergileriň, ylmy maslahatlaryň, medeniýet günleriniň we beýleki forumlaryň yzygiderli geçirilip durulmagy ruhy baýlyklarymyzy dünýä wagyz etmäge giň mümkinçilikleri döredýär.
