Gahryman Arkadagymyzyň taýsyz tagallalary netijesinde Garaşsyz, hemişelik Bitarap Watanymyzda ösüp gelýän ýaş nesilleriň asuda we bagtyýar durmuşda ýaşamagy, berk bedenli, ylymly-bilimli, watansöýüji ýaşlar bolup ýetişmegi üçin giň gerimli işler durmuşa geçirilýär. Ýakynda Türkmenistanyň Içeri işler ministrliginiň Polisiýanyň ýol gözegçiligi müdirliginiň Çagalar awtoşäherçesinde Aşgabat şäheriniň orta mekdeplerinde bilim alýan okuwçy gyzlaryň arasynda ýol hereketiniň howpsuzlygyna bagyşlanan «Ýollarymyz rowan — geljegimiz dowam!» atly bäsleşik geçirildi. Oňa 7-8-nji synplarda bilim alýan okuwçy gyzlar gatnaşdylar.
Türkmenistanyň Içeri işler ministrliginiň Polisiýanyň ýol gözegçiligi müdirliginiň Çagalar awtoşäherçesiniň, Aşgabat şäher Baş bilim müdirliginiň we Türkmenistanyň Magtymguly adyndaky Ýaşlar guramasynyň Aşgabat şäheriniň Bagtyýarlyk etrap Geňeşiniň bilelikde guramagynda geçirilen bu bäsleşigiň öňünde mekdep okuwçylarynda paýtagtymyzyň köçelerinde özlerini howpsuz we medeniýetli alyp barmak endiklerini terbiýelemek maksady durýar.
