Düýn, Türkmenistanyň başlangyjy bilen BMG-niň Baş Assambleýasy tarapyndan «Bütindünýä durnukly ulag güni» diýlip yglan edilen günde paýtagtymyzda «Halkara ulag-üstaşyr geçelgeleri: özara arabaglanyşyk we ösüş — 2024» atly halkara maslahat we sergi öz işine başlady. Üçünji gezek geçirilýän halkara foruma ýurdumyzyň ugurdaş edara-kärhanalarynyň, daşary ýurtlaryň Türkmenistanda iş alyp barýan, şeýle hem hyzmatdaşlygy ýola goýmaga gyzyklanma bildirýän kompaniýalarynyň wekilleri gatnaşýar.
«ITTC 2024» forumy Türkmenistanyň bu ugurda gazananlaryny açyp görkezmekde, tejribeli öndürijileri hem-de üpjün edijileri çekmekde, ulag ulgamynyň dürli pudaklaryndaky hyzmatdaşlar bilen täze taslamalary amala aşyrmak babatda tejribe alyşmakda möhüm meýdança bolup durýar. Diýarymyzyň amatly geoykdysady ýerleşişi, türkmen döwletiniň ulag ulgamynda durmuşa geçirýän işjeň strategiýasy bu ugurda giň mümkinçilikleri açýar. Munuň şeýledigi sergä gatnaşyjylar bilen söhbetdeşligimiziň dowamynda hem gaýta-gaýta bellenildi.
