Düýn paýtagtymyzda 14 ýaşa çenli ýetginjekleriň arasynda 12 döwletiň wekilleriniň gatnaşmagynda geçirilýän «Ashgabat Open 2024» halkara tennis ýaryşynda ilkinji çempionlar kesgitlenildi. Has takygy, oglanlaryň we gyzlaryň arasynda jübütleýin görnüşde geçirilen ýaryşlar tamamlanyp, iki toparda hem türkmenistanly tennisçiler çempion bolmagy başardylar.
Oglanlaryň arasyndaky ýaryşda Nazar Amangeldiýew bilen Kerimgeldi Welibegowyň ildeşlerimizden ybarat başga bir jübüt — Ýunus Annamyradow we Aly Geldiýew bilen finala çykandygyny ozal habar beripdik. Düýn geçirilen final duşuşygynda Amangeldiýew — Welibegow jübüti iki oýunda hem netijeli çykyş edip, güýçli garşydaşlaryndan 2:0 hasabynda üstün çykdylar. Şunda iki oýunda hem güýçleriň deňeçer gelendigini, hasabyň 7:6-a çenli çykandygyny aýtmak gerek. Ýöne oýunlaryň ikisinde-de Nazar Amangeldiýew bilen Kerimgeldi Welibegowa ahyrky hüjümler ýeňiş getirdi.
