Ýakynda paýtagtymyzda «Pähim-paýhas ummany Magtymguly Pyragy» ýylynda gadymy Änew şäheriniň «Türki dünýäsiniň medeni paýtagty» diýlip yglan edilmegine we Gündogaryň beýik danasy Magtymguly Pyragynyň doglan gününiň 300 ýyllygyna bagyşlanyp, Türki medeniýetiň halkara guramasyna (TÜRKSOÝ) agza ýurtlaryň II teatr festiwaly geçirildi. Baý many-mazmuna beslenen teatr festiwalynyň çäklerinde birnäçe medeni çäreler ýaýbaňlandyryldy.
Dabaraly medeni çäräniň açylyşy Beýik Saparmyrat Türkmenbaşy adyndaky Baş akademiki drama teatrynda geçirildi. Oňa gurama agza ýurtlardan gelen medeniýet we sungat ussatlary bilen birlikde Hökümet agzalary, medeniýet we sungat işgärleri, köpçülikleýin habar beriş serişdeleriniň wekilleri, ýokary okuw mekdepleriniň professor-mugallymlary we talyplary gatnaşdylar.
